Xuan María Acebal, acullá de la damnatio memoriae

Formientu. Revista de la VII Xunta d’Escritores Asturianos, númberu 15-16, Gobiernu del Principáu d’Asturies, 2017, pp. 89-91.

Javier Cubero de Vicente

El don d’encender nel pasáu la chispa de la esperanza namás ye inherente al hestoriador que ta convencíu de lo viniente: tampoco los muertos van tar seguros ante l’enemigu cuando ésti venza. Y esti enemigu enxamás cesó de vencer.

Walter Benjamín, El conceptu d’Hestoria (1940).

El castigu más grave qu’esistía nel Imperiu Romanu nun yera nin la crucifixón nin el destierru sinón la conderga de la memoria, el facer desapaecer a una persona de la hestoria del so pueblu. Dende entós, sinón enantes, la narrativa hestoriográfica dominante en cada sociedá ta condicionada pola particular xenealoxía de les sos elites dirixentes. De fechu, el rellatu hexemónicu sobre les batalles del pasáu empondera a los vencedores al empar que desprecia y marxina a los derrotaos. Esti foi, y tovía ye, l’inxustu destín del más ilustre autor de la lliteratura asturiana del sieglu XIX, Xuan María Acebal (1815-1895), doblemente cafiante pa dalgunos tanto pol so compromisu cola dignidá de la llingua asturiana como pola so militancia política nel llexitimismu carlista.

Les guerres carlistes que traviesen la dómina decimonónica implicaron un conflictu ente dos concepciones radicalmente distintes d’entender la pluralidá identitaria de les Españes. Foi un choque ente’l nuevu derechu positivu del Poder central y el vieyu derechu consuetudinariu de les comunidaes perifériques. Los lliberales plantegaben un Estáu-Nación unitariu col envís d’impulsar la centralización política y la homoxenización cultural, mientres que los carlistes reivindicaron los fueros, llibertaes y tradiciones de los estremaos países de la Monarquía hestórica.

Dambos proyectos suponíen, inevitablemente, actitúes antagóniques en rellación a la cultura, la llingua y la lliteratura asturianes. Trunfó’l lliberalismu y el resultáu foi l’arrequexamientu social ya institucional de tou fechu diferencial asturianu. La identidá del País quedó devaluada, clasificada como una variante folclórica y arcaica de la so homologa castellana, qu’en cambiu yera identificada como la única espresión válida de la modernidá y de la españolidá.

Nesi contestu Xuan María Acebal, que dempués de la Tercer Guerra Carlista (1872-1876) abandona l’esiliu francés pa tornar a Uviéu y asistir con indignación al valtu d’El Carbayón, va volcase nel desendolcu d’una obra poética de gran calidá. Dende una visión del asturianu como una realidá llingüística con personalidá propia, unitaria acullá de la variedá dialectal ya independiente al respective del castellanu, va refugar l’esquema diglósicu d’una lliteratura probe, folclorista y costumista pa guetar temátiques d’alta cultura.

Asina va ser el introductor de la llírica na poesía asturiana, lo que representó una innovación d’especial significación na perspectiva autor-receptor al favorecer la espresión abierta de los sentimientos. Per otru llau ye’l primer escritor que supera un llocalismu que nun trespasaba enxamás les llendes del conceyu, pa cantar a Asturies como una unidá comunitaria dende’l monte Aramu hasta la mariña. Nos sos llabores creativos tamién reclamaría la universalidá intelectual del canon grecorromanu coles sos traducciones d’Horacio. Amás tampoco ha escaecese que collaboró col sacerdote Manuel Fernández de Castro, otru destacáu pioneru de la normalización social y normativización lliteraria, na traducción del Evanxeliu según San Matéu.

Na Asturies d’anguaño, nun difícil tiempu de cambiu, la memoria acebaliana inda tien una función na necesaria articulación d’un nuevu discursu identitariu que nos permita avanzar na reconstrucción de la nuesa autoestima como colectividá. Porque como cavilgaba con aciertu Ernest Renan: «Una nación esixe la posesión en común d’un vieyu cementeriu y la voluntá de facer valir esa herencia indivisible; esi ye’l capital social sobre’l cual ta asitiada una idea nacional».

Anuncios

Responder

Introduce tus datos o haz clic en un icono para iniciar sesión:

Logo de WordPress.com

Estás comentando usando tu cuenta de WordPress.com. Cerrar sesión /  Cambiar )

Google+ photo

Estás comentando usando tu cuenta de Google+. Cerrar sesión /  Cambiar )

Imagen de Twitter

Estás comentando usando tu cuenta de Twitter. Cerrar sesión /  Cambiar )

Foto de Facebook

Estás comentando usando tu cuenta de Facebook. Cerrar sesión /  Cambiar )

Conectando a %s

This site uses Akismet to reduce spam. Learn how your comment data is processed.